Meclîsa Jinan a HDP’ê encamnameya civîna nirxandina hilbijartinê ji raya giştî re parve kir. Meclîsê, diyar kir ku di pêvoya hilbijartinê de rolên zayendî hatin xurt kirin, ziman û helwestên zayendperest hatin mezinkirin û got: “Em ê di parlamentoyê de, dengên meclîsa jinan, rêxistinên jinan û femînistan bilindtir bikin.”
Berdevka Meclîsa Jinan a HDP’ê Dîlan Dîrayet Taşdemîr diyar kir ku wan ji bo serdema nû seferberiya rêxistinê dane destpêkirin û got: “Ji bo me serdema nû serdema têkoşînê ye.”
Seroka YAKA-KOOP'ê Gulmay Gumuşhan, anî ziman ku bûyerên îstismarkirina zayendî ya li hemberî zarokan li welatên ku darvekirin lê hene bêtir rû didin û got: "Beriya nîqaşkirinên derbarê darvekirinê de, divê dadgeh pêşî daxistina ceza ya rewşa çê ya ji bo kiryarên îstismarê dikin rakin."
Zarokek keçik a ku xwîna wê der bû, ji bo derman bistîne çû dikana etar O.B. yê 68 salî. Zaroka keçik rastî îstîsmara zayendî ya O.B. hat. O.B. yê girtî bi van gotinan xwe parast: “Ez Walî nas dikim. Midûrê emniyetê nas dikim.”
Parlamentera HDP’ê ya Enqerê Fîlîz Kerestecîgolu, nîqaşên darvekirin û xesandinê yên li dijî tecawîzên zarokan nirxand û got: “Ev polîtîkayên rojane yên hêrsa mirovan kêm dikin e. Pirsgirêka harî mezin xwe negihandina edaletê ye.”
Platforma Jinan a Rihayê xwest ku demildest Komîsyona Îstîsmara Zarokan a TBMM’ê bê avakirin.
Hevseroka Giştî ya HDP’ê Pervîn Buldan di civîna Meclîsa Jinan a HDP’ê de bal kişand ser qezaya trênê ya li Çorluyê û got: “Ne qezayek e ji rêzê ye. Qezayek cînayetê ye.” Buldan got ku wan tevî hemû zextan jî serkeftinê bi dest xistiye û temsîliyeta herî zêde ya jinan a li Meclîsê dîsa jî HDP ye.
Parêzera femînîst Dîren Cevahîr Şen têkildarî revandina zarokan û îstîsmarkirina li ser zarokan axivî û got: “AKP wisa jidil be neçar e femînîst û rêxistinên jinan bike muxatabê xwe.”
Civaknas Şeyma Arslantaş bal kişand ser kuştin, tundî û îstîsmarên zayendî yên li ser jin û zarokan ên li Tirkiyeyê zêde dibin û got: “Ji ber kujer cezayê heq dikin li wan nayê birîn, bûyerên wiha zêdetir dibe. Darvekirin jî, hişmendiya teşegirtina hikûmeta AKP’ê ya derdikeve holê ye.”
Di meha Hezîranê de 39 jin hatin kuştin. Sekretera Giştî ya KCDP'ê Fîdan Ataselîm, diyar kir ku sedema vê yekê zimanê şidetê û polîtîkayên tên meşandin bixwe ye. her wiha Ataselîm got, bi vekirina meclîsê re tê xwestin ku xesandina kîmyewî û darvekirin bê qanûnîkirin û bi vê yekê re hêrsa civakê tê îstismarkirin.
Seroka Komîsyona Şopandina Mafên Zarokan û Jinan a CHP'ê Candan Yuceer destnîşan kir ku dewlet di warê mijara îstismarkirina zarokan de hewl dide civakê di nav nîqaşên darvekirin û xesandinê de bifetisîne. Yuceer got: "Eger îktîdar bibêje darvekirin, nexwe neyta wê nebaş e."
Sekretera Jinê ya Şaxa Egîtîm Senê ya Manisayê Ayşe Başaran, diyar kir ku mijarên der barê îstîsmar û darvekirinê de hatiye avakirin bi awayekî çêker e û wiha got: “Di dema îdam hebû de kesên tev li sûcê îstîsmarê bûbûn nehatin cezakirin.
Platforma Jinan a Axtamara li dijî îstîsmar û windabûna zarokan ên di demên dawî de daxuyanî da û got: “Cezayê mîna darvekirin û xesandinê ji bilî ser pirsgirêkê girtin tu tiştek din nîne û ev cezakirin kêrî tiştekî nayê.”
Tevgera Jinên Azad (TJA) bertek nîşanî windakirin û kuştina zarokan da û xwest bi lez saziyên zarokan ên bi KHK'ê hatin girtin bên vekirin.
Zohre Koseya 75 salî ku li Dîlokê dikana bi navê "Cihê Dayika Zohreyê" vekiriye û nanê sêlê, nanê malê û tiştên din difiroşe, diyar kir ku jin bi xebatê dikarin ji mêr xelas bibin û got: "Divê jin li malê rûnenên."