Rojnamevan-nivîskar Ayşe Duzkan destnîşan kir ku bi destpêkirina êrîşên li ser Efrînê re bi destê çapemeniyê şer û mîlîtarîzm tê gurkirin û got: “Mirov tim leqayî rêzefîlmên ku mêr bi kincên leşkerî bi wêrektiya xwe pesnê xwe didin tê. Bi destê çapemeniyê tê lansekirin ku mirin û kuştin tiştekî baş e û wekî tişta herî baş ku mêr dike tê lansekirin.”
Li Manîsayê jinên ku bi strandina hineya Newrozê amadekariyên pîrozbahiya Newrozê dikin, diyar kirin ku ew ê daxwaz bikin ku dawî li êrîşên li ser Efrînê bên.
Li terziyên Mêrsînê beriya Newrozê daxwaza ji bo kiras û fîstanan jî zêde bû. Terzîvan Gurbet Gergîn got: “Ji bo jinan cilên gelerî reng û remza Newrozê ne.”
Li Bornovayê, H.S. a 17 salî ku mêrekî ew taciz kir, li emniyetê polîsan jê xwest ku dev ji gilîkirinê berde û gotin: “Eger naxwazî malbata te li ber bikeve, gilî neke.”
Rehşan Demîrel, Sema Yuce, Zekiye Alkan, Ronahî û Bêrîvan agirê Newrozê bi şewitandina bedena xwe pîrozkirin. Li Kobanê Arîn Mîrkan û li Efrînê jî Avesta Xabûr û Barîn Kobanê jî bi çalakiyên xwe berxwedanê li agirê Newrozê geş kirin.
Endama DÎK’ê Hatîce Kavran, bertek nîşanî êrîşên li ser bedena jinan da û got: “Heya ku Fir’ewn û Yêzîdiyan hebin, dê Zeyneban jî berxwedana xwe bidomînin. Yek ji Misilmanên Dijkapîtalîst Hediye Yolcu jî, got ku hişmendiya serdest, di şer de bi teşhîr kirina bedena jinê dixwaze peyama “Em bi hêzin” bidin.
Derhênerên îranî, tûnûsî û kanadayî diyar kirin ku çêkirina fîlman a jinan çalakiyeke polîtîk e û gotin: “Em bi fîlmên ku dikişînin hebûna jinan nîşan didin.”
Hevşaredara Bajarê Mezin a Amedê Gultan Kişanak, ji girtîgehê peyam şand û got: “Êrîşên li ser Efrînê bêhêz xistina vîna jina azad e. Ger em jin xwedî li vîna azad derbikevin , em ê karibin vî şerî rawestîn in.”
Kayuş Çalikman Gavrîlof, bal kişand ser girîngiya berxwedana jinan a li dijî êrîşên li ser Efrînê û got: “Îro jinên Kurd, ereb, suryan û ermenî li Efrînê mil bi mil şer dikin. Ev yek Tirkiye dîn û har kir.”
N.Y.A., ya rastî îstîsmara zayendî ya B.A. hat, diyar kir ku ji ber B.A., serbest hat berdan ewlehiya wê tune û jiyana wê di talûkeyê de ye. N.Y.A., diyar kir ku ew naxwaze wekî Helin Palandoken bê kuştin û wiha got: "Dema ez bêm kuştin jî dê bêjin bi riza wê bû.
Hevseroka Giştî ya ÎHD'ê Eren Keskîn, beşdarî panela 8'ê Adarê ya li Cizîrê pêk hat bû û wiha got: "Bi riya darazê îstîsmara zayendî û tundî rewa dikin." Hevseroka Giştî SES'ê Gonul Erden jî diyar kir ku ew dê bi rûhê 8'ê Adarê tev li Newrozê bibin u wiha got: "Cizîr dîroka raperînê ya li dijî zilmê ye."
Fermandara YJA Starê Hulya Eroglu (Delal Amed) ku hêj 5 salî bû çû dibistana seretayî û berî her kesî fêrî xwendin û nivîsandinê bû, di hemû qada jiyana xwe de pêşengî kir. Delal Amed, 3 sal berê peyama 8'ê Adarê di 8'ê Adara 2015'an de dabû û gotibû "Em di her qadê de bihara jinê dijîn."
Jinan li Atînayê bi boneya 8’ê Adarê Roja Jinan a Cîhanê meş û bernameyek hunerî li dar xistin. Siyasetmedara kurd Ruken Demîr axivî û diyar kir ku ew civakîbûna bi pêşengiya jinê li Çiyayê Kurdistanê pêş dikeve silav dikin û dê sedsala 21’an veguherînin serdema azadiya jinê.
Mîhrîcana Fîlmên Jinan a Fîlmmorê di 10'ê Adarê de bi atolyeya fîlmên kurt dest pê bike. Kordinatora Filmmor Melek Ozmen, diyar kir ku di atolyeyê de jinên ku reng û rûyên sinemayê biguherîne cih digirin.
Mîtînga 8'ê Adarê ya li Amedê bi tevlêbûna hezaran jin pêk hat bi Efrînê dest pê kir û bi Efrînê bi dawî bû. Parlamentera HDP'ê Feleknaz Uca, ji hemû girtiyan û Ocalan re slavên xwe şand û wiha got: "Em qadan terk nakin û em dê her dem govenda azadiyê geş bikin. Ji mere dibêjin qala Efrînê nekin. Em şerê li ser Efrînê şermezar dikin û em her em li dijî şer in."