ŞIRNEX - Hevseroka Giştî ya KESK’ê Ayfer Koçak bertek nîşanî ferzkirina sîxuriyê ya di bin navê "semînerê" de li ser xwendekarên da û got: "Divê demildest dev ji polîtîkayên milîtarîst û şerxwaziyê bên berdan.”
Şaxa Şirnexê ya Sendîkaya Kedkarên Perwerde û Zanistê (Eğîtîm Sen) der barê ferzkirina sîxuriyê ya ji aliyê Midûriyeta Polîsan a Şirnexê ve di bin navê “Ciwanên Şirnexê û Pêşerojek Ewle” de li ser xwendekarên Şirnex û navçeyên wê hate kirin, li ber avahiya Rêveberiya Perwerdehiya Neteweyî daxuyanî da çapemeniyê. Hevseroka KESK’ê Ayfer Koçak, endamê Lijneya Rêveberiya Navendî ya Egîtîm Senê Zulkuf Guneş, şaxên Mêrdîn, Amed û Êlîhê û rêxistinên bajar û navçeyan ên Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) beşdarî daxuyaniyê bûn.
Di daxuyaniyê de pankarta "Bi protokolan zarokan ji perwerdeyê bêpar nehêlin" hate vekirin û dovîzên "Dawî li polîtîkayên sîxuriyê bînin" hatin hilgirtin.
Serokê Şaxa Sena Perwerdehiyê ya Şirnexê Adnan Şenbayram daxuyaniya çapemeniyê xwend û diyar kir ku semînerên ku behsa wan tê kirin, beşek ji projeyên veguherîna îdeolojîk ên Wezareta Perwerdehiya Neteweyî ne û got: “Wezaretê van projeyên veguherîna îdeolojîk û paşverû di bin navê Modela Perwerdehiya Sedsala Tirkiyeyê de fermî kiriye û bi rêya ÇEDES û mîna protokolên perwerdehiyê hewl dide ji zanistî, laîk û hemdemiyê dûr bixe.”
Şenbayram diyar kir ku di semînerên "Ciwan û Paşeroja Ewle" de ku di Nîsan û Gulana 2024’an de ji bo xwendekarên dibistana navîn ên pola 9an hatine lidarxistin, binpêkirinên mafên mirovan ên cidî çêbûne. Şenbayram diyar kir ku ev semîner bi hevkariya yekîneyên ewlehiyê hatine lidarxistin, naverokên ku nirxandinên pedagojîk derbas nekirine û ji hêla şêwirmendên dibistanê yan pisporan ve nehatine çavdêrîkirin, hatine bikaranîn.
Şenbayram wiha berdewam kir: "Di semîneran de, dîmenên tundiyê û pevçûnê nîşanî xwendekaran dan, zimanê sîxuriyê hate ferzkirin, û hişmendiya xwendekaran bi gotinên milîtarîst û nîjadperestiyê manîpulekirin."
'DEV JI POLÎTÎKAYÊN MILÎTARÎST BIDIN'
Piştre Hevseroka Giştî ya KESK’ê Ayfer Koçak axivî û diyar kir ku polîtîkayên li ser xwendekaran tên kirin nayên qebûlkirin û got: “Pêşeroja zarokan tarî dikin, daristanên derdora Şirnexê wêran dibin, çiyayên wê tên hilweşandin û pêşeroja wan bi destwerdana perwerdehiyê tê tinekirin. Civînên komîsyona xwişk-biratî û hevgirtinê li Enqereyê têne lidarxistin û pêvajoyek aştiyê tê destpêkirin. Ev ji serdema bê pevçûnê ne qut e. Belê, demên şer demên ku demokrasî ji golê tê rakirine. Di nebûna demokrasiyê de, feqîrên ku bi keda xwe dijîn, bedela wê didin. Em êdî naxwazin vê bedelê bidin. Divê demildest dev ji polîtîkayên milîtarîst û şerxwaziyê bên berdan.”