ENQERE - Fîlozofa Alman Lîsa Herzog bi peyamê re piştgirî da Pêvajoya Aştî û Civaka Demokratîk û got, "Ji her kesên tevlî pêvajoyê bûne re hêvî û hîkmet dixwazim ku karibin aştiyeke adîl, demokratîk û mayînde pêk bînin."
Fîlozofa Alman Lîsa Herzog têkildarî "Pêvajoya Aştî û Civaka Demokratîk" peyama piştevaniyê parve kir. Profesora Zanîngeha Gronîngenê ku bi xebatên xwe yên felsefeya siyasî û teoriya aboriyê tê naskirin Lîsa Herzog bi peyamekê ku ji Partiya Wekhevî û Demokrasiyê ya Gelan (DEM Partî) re şandî piştgiriya xwe ya ji bo pêvajoyê vegot. Peyama Lîsa Herzog wiha ye: "Di serdemeke ku jiyana mirovan her diçe bê qîmet dibe de, her têkoşîna ji bo aştiyê dilê me rihet dike. Ji bo aştiyeke adîl, demokratîk û mayînde pêk were, ji her kesên tevlî pêvajoyê bûne re hêvî û hîkmet dixwazim."
LISA HERZOG
Lîsa Herzog di 17ê Kanûna 1983'yan da ji dayik bû, doktoraya xwe li Zanîngeha Oxfordê bi nivîsandina têza li ser Adam Smith û Hegel qedand. Xelatên Ernst Bloch û Hans Bockler wergirt, Herzog jî demekê bi yek ji ramangerên Dibistana Frankfûrtê Axel Honneth re xebitî. Fîlozof niha li Navenda Felsefe, Siyaset û Aboriyê ya Zanîngeha Gronîngenê profesor e.