Kongreya Demokratîk a Gelan (HDK) di 3’yê Mijdara 2024’an de 13’emîn Kongreya Asayî li dar xist û ji bo avakirina aştiyê plansazî û bernameyek danî pêşiya xwe. Di vê çarçoveyê de civînên bi gel re, konferans û panel hatin lidarxistin. HDK, ji bo civakîkirina “Banga Aştî û Civaka Demokratîk” a Rêberê Gelê Kurd Abdullah Ocalan jî lez da xebatên xwe. 

 

Hevberdevka HDK’ê Meral Daniş Beştaş têkildarî xebatan, pêvajoyê û geşedanên li Rojhilata Navîn axivî. 

 

‘YEK JI PIRSGIRÊKÊN TIRKIYEYÊ AŞTÎ YE’ 

 

Meral Daniş Beştaş, diyar kir ku yek ji pêdiviya herî mezin a Tirkiyeyê aştî ye û got ku Abdullah Ocalan ji salên 90’î heta niha her tim xwestiye pirsgirêka Kurd bi rêbazên demokratîk çareser bibe. Meral Daniş Beştaş, got ku baweriya gel bi îktîdarê nayê û fikaredar nêzî pêvajoyê dibin. Meral Daniş Beştaş, got: “Li rexekî daxwazeke mezin heye lê li rexa din fikar hene. Ev jî ji ber şêweyê rêvebirinê yê îktîdarê ye. Weke mînak, ji 2015’an heta niha plana têkbirinê di meriyetê de ye.” Meral Daniş Beştaş, ku girtin, binçavkirin û komkujiyên ji 2015’an heta niha bi bîr xist, anî ziman ku ev kiriyar di bîra gelê Kurd de ye û got: “Malbatên hêj li cenazeyên zarokên xwe digerin hene. Xizmên girtiyên nexweş hene. Gelek mînakên wekî van, fikar û bêbaweriyê zêde dikin.” 

 

BANGA ABDULLAH OCALAN 

 

Meral Daniş Beştaş, bal kişand ser piştevaniya navneteweyî ya siyasî û civakî ya ji bo banga Abdullah Ocalan û got ku di rewşekî wiha de li Tirkiyeyê beşekê civakê weke “dijmin” hatiye ragihandin û operasyonên li dijî CHP’ê bi bîr xist. Meral Daniş Beştaş, destnîşan kir ku divê hemû kes tev li pêvajoyê bibe û got: “Gel, ji me re dibêje ‘Çi bendewariya we ji îktîdarekê ewqas zextê dike û darazê weke amûr bi kar tîne heye?’ Têkoşîna aştiyê û ya civaka demokratîk girêdayî hev in. Em ji bo her kesî edalet, demokrasî û azadiyê dixwazin.” 

 

‘PÊVAJO BI GELAN RE DIKARE BIMEŞE’

 

Meral Daniş Beştaş, daxuyand ku îktîdar zextê li CHP û muxalefetê dike û bal kişand ser operasyona li dijî HDK’ê. Meral Daniş Beştaş, got ku ev kiriyar zirarê didin pêvajoyê û rê li bêbaweriyê vedikin. Meral Daniş Beştaş, got ku tevî her êrişan jî ew ê dev ji têkoşîna xwe bernedin û ev tişt anî ziman: “Ev pêvajo ne tenê bi îktîdarê re, bi gel re tê meşandin. Hemû welatî li dora vê maseyê ne.” 

 

AVAKIRINA KOMÎSYONÊ

 

Bi domdarî Beştaş, anî ziman ku di pêvajoyên diyalog û muzakereyê de divê hin tişt bên kirin û got: “Divê di qanûnan de jî guhertin bên kirin. Navnîşana vê jî Meclis e. Birêz Ocalan jî vê dibêje. Bi qasî ez dibînim, ji bilî Partiya Îyî tu partî li dijî vê komîsyonê nînin. Em li bendê ne di nava vê hefteyê de ava bibe û di Tirmehê de jî teşe bidinê. Piştre jî dê guhertinên din di rojevê de bin.” 

 

DIVÊ MEKANÎZMAYÊN DARAZÊ BIGUHERIN

 

Meral Daniş Beştaş, got ku ji bo serkeftina pêvajoyê divê mekanîzmaya darazê biguhere, divê tayînên HSK’ê adilane bin, destûreke bingehîn a demokratîk were çêkirin û got: “Divê perwerdeya bi zimanê dayikê hebe, rêveberiyên herêmî bên xurtkirin, hemû ziman bikare di qada cemaweriyê de bên bikaranîn û navên cihan biguherin. Divê Qanûna Têkoşîna li Dijî Terorê jî biguhere.” Meral Daniş Beştaş, got ku divê îktîdar lez bide xebatên xwe, bi bîr xist ku Meclis dê di 1’ê Tîrmehê de bikeve betlaneyê û xwest hemû komên parlamentoyê di wê navberê de xebatan bimeşînin. 

 

GEŞEDANÊN LI ROJHILATA NAVÎN 

 

Meral Daniş Beştaş, bal kişand ser geşedanên li Rojhilata Navîn û got: “Geşedanên diqewimin, ji Tirkiyeyê re dibêjin ‘pirsgirêkên xwe çareser bike.’ Li Rojhilata Navîn rewşekî metirsîdar heye. Dewletên serdest hewl didin teşe bidin vê xakê. Em ne bi Îsraîlê ne jî bi Îranê re ne. Bo me ya girîng, şêweyê rêveberiyê, nêzikatiya li dijî dijî gel û nirxên mirovî ne. Duh l Îranê du ciwanên Kurd darve kirin. Em behsa rejîmeke zilmê dike dikin. Îsraîl li Xezeyê qirkirinê dike. Em li gel demokratîkbûna Rojhilata Navîn in. Em Rêya Sêyemîn temsîl dikin.”

 

MA / Melîk Çelîk