AMED - Hevserokê Giştî yê DEM Partiyê Tuncer Bakirhan li Amedê bi ciwanan re civiya û got: “Heke ciwan xwedî li vê pêvajoyê derkevin, em dikarin civakek û welatekî demokratîk ava bikin.”
Piştevaniya Xwendekarên Azad ên Dîcleyê di çarçoveya “Banga Aştî û Civaka Demokratîk” a Rêberê Gelê Kurd Abdullah Ocalan de li avahiya Şanoya Bajêr a Amedê bi dirûşma “Tev li bibe, nîqaş bike, biguherîne” panelek li dar xist. Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, endam û rêveberên DEM Partiyê û gelek xwendekar tev li panelê bûn.
‘PERGALÊN CIWAN DI NAV DE NEBIN BI TÊKÇÛNÊ RE RÛ BI RÛ DIMÎNIN’
Tuncer Bakirhan, di panelê de axivî û diyar kir ku partiya wan partiyeke ciwanan e. Bakirhan, got ku partiyên ciwan têde hebin tevî êrişan jî li ser pêya dimînin û hebûna xwe didomînin. Bakirhan, destnîşan kir ku hemû pergalên ku ciwan di nav de nebin bi têkçûnê re rûbirû dimînin û qala girîngiya rol û misyona ciwanan kir.
‘EM LI CEM KESÊN HÊVIYÊ DIDIN DISEKININ’
Bi domdarî Bakirhan da zanîn ku li cîhanê gelek krîzên aborî hene û bi lêv kir ku hêzên hegemon ku dibin xwediyê rêyên bazirganiyê şer û pevçûnan derdixînin. Bakirhan, anî ziman ku tevî krîz û aloziyên heyî jî hêviya wan xurt e û wiha dirêjî da axaftina xwe: “Em jî hewl didin li cem kesên ku hêviyê didin bisekinin. Li kêleka me pergalên nû tên avakirin. Hêdî hêdî pergalên yekperest bi dawî dibin. Welatên ku bi awayekî wekhev nêzî civaka xwe bin, têk naçin. Banga birêz Abdullah Ocalan jî li ser vê yekê ye. Birêz Ocalan ev yek dît.”
‘BERPIRSYARTIYA ME MEZIN E’
Bakirhan, bi berdewamî destnîşan kir ku banga 27’ê Sibatê ya Rêberê Gelê Kurd Abdullah Ocalan destpêka pêvajoyeke nû ye û ev tişt anî ziman: “Banga 27’ê Sibatê dîroka gelê Kurd û Tirk a hezaran salan jî li ber çavan digire. Birêz Ocalan îşaret dike ku weke Dîwarê Berlînê, dîwarê di nava gelan de hilweşiya. Li vir peywir û berpirsyartiyeke mezin dikeve ser milê me. Heke ciwan bi xwendinên xwe xwedî li vê pêvajoyê derkevin em dikarin civakek û welatekî demokratîk ava bikin ku gelê Kurd û civaka Elewî tune neyên hesibandin. Berpirsyartiya me gelek mezin e.
JI BO AVAKIRINA CIVAKA DEMOKRATÎK DIVÊ EM TÊBIKOŞIN
Li Tirkiyeyê ciwan weke xetere hatin dîtin. Bila ciwan polîtîk nebin gelek polîtîkayên qirêj li ser ciwanan hatin meşandin. Kemal Kurkut, Şerzan Kurt û gelek ciwanên din bûn qurbanê van polîtîkayan. Di vê pêvajoyê de divê ewilî ciwan berpirsyartiyê bigirin. Bêyî ku guh bidin gotinên derdorê divê ji bo siyaseta Tirkiyeyê biguherînin bikevin nava liv û tevgerê. Tirsa herî mezin a pergalan, azadîbûn û demokratîkbûn e. 600-700 hezar xwendekar neçar man dest ji zanîngehên xwe berdin. Ji xwe tu wateya dîplomeyan jî nemaye. Ji bo avakirina bingeke demokratîk a li Tirkiyeyê divê em têbikoşin. Banga aştî û civaka demokratîk ne tene ji bo Kurdan, ji bo 85 milyon mirovên azadîxwaz e. Pêşiyê li ciwanan vedike. Em bawer dikin ku em ê bi ser kevin.”
Piştî axaftinan, panel ji çapemeniyê re girtî berdewam kir.