Çalakiyên li Îzmîr, Stenbol û Enqereyê yên ji bo balê bikişînin ser rewşa girtiyên nexweş dewam kirin.

 

ÎZMÎR

 

Çalakiya rûniştinê ya ji aliyê Şaxa Komeleya Mafên Mirovan (ÎHD) a Îzmîrê ve ji bo rewşa girtiyên nexweş di hefteya 306’an de dewam kir. Di çalakiyê de pankarta "Ji Girtiyên Nexweş re Azadî" hat vekirin. Daxuyaniya çapemeniyê ya kurdî ji aliyê Hevseroka Şaxa ÎHD'ê ya Îzmîrê Zîlan Gumuş, ya tirkî jî ji aliyê Rêveberê Şaxa ÎHD'ê ya Îzmîrê Ahmet Çîçek ve hat xwendin.

 

Di çalakiya vê hefteyê de li ser rewşa girtiyê bi nexweşiya giran Abdullah Yilmaz (62) ê li Girtîgeha Ewlehiya Bilind a Hejmar 1 a Xarpêtê girtî ye hat sekinandin. Di daxuyaniyê de hat diyarkirin ku Yilmazê ku di 13'ê Çileya 2017'an de hatiye girtin gelek nexweşiyên wî yên kronîk hene û ji ber van nexweşiyan Yilmaz zehmetiyê dikişine. Di daxuyaniyê de hat ragihandin ku Yilmaz ji ber nexweşiyên xwe gelek caran bi piştgiriya hevalên xwe dikare pêdiviyên xwe bi cih bîne û wiha hat gotin: "Em daxwaz dikin ku hemû muayene û tedawiyên Abdullah Yilmaz bi temamî bên kirin, înfaza wî bê taloqkirin. Ji ber şert û mercên girtîgehê nexweşiyên wî nayên dermankirin û ji bo malbata wî karibe hevdîtinê pê re bike divê sewqî girtîgeheke nêzî malbatê bê kirin."  

 

STENBOL

 

Komîsyona Girtîgehan a Şaxa ÎHD'ê ya Stenbolê çalakiya 672'yemîn a "Rûniştina F" ya ku her hefte li dar dixe, li ber avahiya komeleyê ya navçeya Beyoglû li dar xist. Di çalakiya vê hefteyê de li ser rewşa tenduristiyê ya girtiyê nexweş ê giran Sîddik Guler ê 85 salî ku li Girtîgeha Tîpa T a Îskenderûnê girtiye, hat sekinandin. Di çalakiyê de pankartên "Bila Siddik Guler bê berdan" û "Tecrîd sûcê li dijî mirovahiyê ye" hatin hilgirtin û dirûşmeyên "Bila girtiyên nexweş serbest bên berdan", "Bil Siddik Guler serbest bê berdan", "Tecrîd dikuje, hevgirtin jiyan e" û "Mirov bi mafên xwe mirov e" hatin berzkirin.

 

Endamê Şaxa ÎHD'ê ya Stenbolê Taylan Bekîn diyar kir ku nikare Siddik Guler bi tena serê xwe pêdiviyên xwe dabîn bike û got: “Nexweşiyên Siddik Guler ên wekî hîpertansiyon, nexweşiyên hestî û dil, kêmbûna venoz, romatîzma movikan a înflamatuar û Alzheîmer hene."

 

Bekîn got: “Tevî ku Siddik Guler ji ber gelek nexweşî û temenê xwe nikare bi tena serê xwe jiyana xwe bidomîne jî, berdewamiya girtina wî ya li girtîgehê gefê li tenduristî û jiyana wî dixwe. Em bang li rayedaran û raya giştî dikin ku bi hestiyar tevbigerin da ku girtiyê nexweş Siddik Guler ê 85 salî û hemû girtiyên nexweş bên berdan û mafên wan ên tenduristî û jiyanê bên parastin."

 

Çalakî bi dirûşmeyên “Bila girtiyên nexweş bên berdan” û “Tecrîd dikuje, hevgirtin jiyan e" bi dawî bû.

 

ENQERE

 

Înîsiyatîfa Ji Girtiyên Nexweş re Azadî ji bo balê bikşîne ser girtiyên nexweş di hefteya 544'an de li Kolana Sakarya ya navçeya Çankayayê hatin cem hev. Endamên Înîsiyatîfê bal kişandin ser rewşa girtiyê nexweş ê giran Îsa Ozgan ê li Girtîgeha Girtî ya Tîpa L a Hejmar 5 a Marmarayê tê girtin.

 

Endama Lijneya Rêveberiya Navendî (MYK) ya Komeleya Mafên Mirovan (ÎHD) Nûray Çevîrmenê diyar kir ku gelek nexweşiyên kronîk ên wekî dil, tansiyona zede, diyabet, made, prostat û romatizma yên girtiyê nexweş Îsa Ozgan ê 78 salî hene. 

 

Nuray Çevîrmenê da zanîn ku ji ber nexweşînên kronik divê Ozgan her roj dermanan bi kar bîne, lê dewlet dermanên wî nakire. 

 

Nuray Çevîrmenê xwest dermankirina Îsa Ozgan bi awayekî rêkûpêk bê kirin û dermanên wî bên peydakirin.