Ciwanê bi navê Şahîn Oner (19) di 10’ê Sibata sala 2013’an de li Amedê ji hêla polîsê bi navê Selahattîn Korkmaz ve bi wesayîta zirxî hate qetilkirin. Di 23’yê Mijdara 2021’ê de jî ji ber sûcê “Bi qisûra xwe ya zanebûn bûye sedema mirinê” 4 sal û 5 meh û 10 roj cezayê hefsê li bersûc Korkmaz hate birîn. Her du aliyan jî ji ber cezayê ji hêla 1’emîn Dadgeha Cezayên Giran a Amedê ve hatibû dayin, serî li Îstînafê dan. Daîreya 3’yan a Dadgeha Edliyeyê ya Herêma Amedê jî bûyer weke “qezaya trafîkê ya sivik” nirxand û ji ber nakokiyên di dosyayê de, biryara “lêkolîn kêm hatiye kirin” da û doz betal kir. 

 

Piştî betalkirina biryarê, doz di 30’ê Nîsana 2024’an de jinûve hate lidarxistin. Şandeyeke pisporan ên ji hîndekarên Fakûlteya Veguhestin/Makîneyê ya Zanîngeha Teknîkê ya Stenbolê (ÎTU) pêk dihat, di 22’yê Çileyê de raporek amade kir û ev rapor li dosyayê hate zêdekirin. Di rapora pisporan de hate îdiakirin ku polîsê bersûc “qisûrdarê talî” û Oner jî “qisûrdarê eslî” ye. 

 

ŞAHID: DIHAT DÎTIN

 

Şahidê bûyerê Yilmaz Dag di danişîna dozê ya di 29’ê Gulana 2018’an de axivî û got: “Panzer, bi ser mirî re derbas bû û li erdê kaş kir. Heta ber deriyê avahiya duyemîn bir. Panzera duyemîn hat û li ber serê kesê mirî sekinî. Kesê mirî, beriya panzer bide ser her du destên xwe rakir hewayî û li naverasta kolanê bû.” 

 

Şahidê din Levent Çartay jî heman îfade dabû û şahidiya xwe ya bûyerê wiha vegotibû: “Panzer pir bi suret kete nava kolanê û hindik mabû li dîwar bixe. Ciwan reviyan, kesê mirî jî zivirî û baz da. 10 metre piştre sekinî, berê xwe da panzerê û her du destên xwe rakir hewayî. Di navbera wî û panzerê de bi qasî 5 metreyan navber hebû lê panzer hêj bi suret diçû. Piştî panzerê lê xistî jî nesekinî û li pey ciwanên din çû. Navbera zarok û panzerê navbereke wisa bû ku panzer wî bi rehetî bibîne. Ne bawerim panzerê fren kiribe. Piştre jî panzera duyemîn hat û li ber serê wî sekinî. Polîsên ji wesayîta duyemîn derketin, çêr li zarokê birîndar kirin. Polîsek ji wan li amirê xwe geriya û jê re got ‘bombeya deng a zarok teqiyaye.’ Min tu tiştek di destê zarok de nedîtibû. Li gorî min kesê bi panzerê dabû ser, bi zanebûn ew eciqand. Bûyer, qeza nebû.” 

 

HEMAN BIRYAR HATE DAYIN

 

Di danişîna biryarê ya di 19’ê Adarê de biryar hate dayin. Dadgehê, ji sûcê “bi qisûra xwe bûye sedema mirinê” 3 sal û 4 meh cezayê hefsê da polîsê bersûc. Di biryara bihincet de dadgehê îfadeyên şahidan esas negirt. 

 

PARÊZER Û DOZGER SERÎ LI ÎSTÎNAFÊ DAN 

 

Hem dozgeriyê hem jî parêzerên malbata Oner li dijî biryarê serî li îstînafê dan. Di serlêdana Serdozgeriya Komarê ya Amedê de hate îdiakirin ku cezayê li bersûc hatiye birîn zêde ye. 

 

Di serlêdana parêzeran de jî biryar weke “derhiqûqî” hate nirxandin. Di serlêdanê de hate gotin ku tevî bersûc zarok dîtiye jî wesayît bi lez ajotiye û tevî Oner destên xwe rakiriye jî leza xwe kêm nekiriye, li Oner xistiye û piştre jî ser re derbas bûye. Di serlêdanê de hate gotin ku polîsên bi wesayîta zirxî hatibûn cihê bûyerê, Oner ê bi giranî birîndar bûyî birine emniyetê. 

 

Her wiha hate bibîrxistin ku hinek dezgehên çapemeniyê li ser daxuyaniya walîtiyê nûçeyên bi îdiaya “Çalakvanekî dema dixwest bombeyê biavêje polîsan, bombe di nav lepên wî de teqiya û jiyana xwe ji dest da” parve kirine. Di serlêdane wiha hate gotin: “Meqama walîtiyê xwest tavilê mudaxileyî lêpirsînê bike û hewl da sûcê heyî veşêre.” 

 

'ÎFADEYÊN POLÎSÊN ŞAHID HEV NAGIRIN’ 

 

Bi domdarî di serlêdane hate gotin ku polîsên diviyabû ji sûcên “Terkexemiya di dema peywirê de/ ji ber terkexemiyê mirov kuştine/ tunekirina delîlan” bihatina darizandin, weke şahid lê hatiye guhdarîkirin û wiha hate gotin: “Ji ber ku bi danişînên telîmatan li van şahidan tê guhdarîkirin, mafê me yê pirsjêkirinê hatiye astengkirin, rêgeza rûbirûbûyînê hatiye binpêkirin û nehiştine em bi awayekî çalak tev li dosyayê bibin. Polîsên di dema lêpirsînê de mîna hev îfade dane, di pêvajoya teqîbatê de îfadeyên hevnegirtî û binakok dane.”

 

Di serlêdanê de hate gotin ku Oner “biqesdî” hatiye kuştin û bal kişand ser îfadeyên şahidên bêalî, raporên nexweşxane û tipa edlî. Parêzeran, xwestin biryar were betalkirin û cezayeke giran li bersûc were birîn. 

 

MA / Rûkiye Payîz Adiguzel