Serokê Giştî yê PSAKD'ê: Ji bo aştiyeke rast divê Ocalan serbest bê berdan 

2025-08-29 09:08:39


	ENQERE - Serokê PSAKD'ê Cûma Erçe diyar kir ku aştî ji bo vî welatî pêwîstiyeke derengmayî ye û got: "Mesele guhertina ferasetê ye. Ger aştiyeke rastîn bê nîqaşkirin, divê Abdullah Ocalan û hemû girtiyên siyasî serbest bên berdan."

	 

	Komîsyona Hevgirtina Neteweyî, Xwişk-Biratî û Demokrasiyê ku ji bo çareserkirina pirsgirêka Kurd li meclisê hat avakirin, xebatên xwe didomîne. Komeleya Çandê ya Pîr Sultan Abdal (PSAKD) di nav saziyên ku ji hêla Partiya Wekhevî û Demokrasiyê ya Gelan (DEM Partî) ve ji bo guhdarkirinê pêşniyazî komîsyonê hat kirin de bû. 

	 

	Serokê Giştî yê PSAKD'ê Cûma Erçe li ser rol û xebata komîsyonê axivî.

	 

	Erçe diyar kir ku daxwazên Elewiyan hemwelatîbûna wekhev ji bo hemû gelan e û aştî ji bo welêt pêdiviyek pir derengmayî ye. Erçe, got: "Budçeya ku bi salan e ji bo bombe û çekan tê veqetandin, bûye sedema xizaniya mirovan. Ji ber vê yekê, pêvajoya aştiyê ji bo me bi qîmet e. Pîvana herî bingehîn a pêvajoyê aştî ye. Em dizanin ku aştî bêyî samîmiyetê ne mimkûn e. Di encama danûstandinên bi rêberên gelê Kurd re, aliyekî samîmiyeta xwe di asta herî bilind de bi danîna çekan nîşan da. Lêbelê, ji hêla dewlet û desthilatê ve gavek jî nehatiye avêtin. Berevajî vê, serhişkiya feraseta kevn berdewam dike."

	 

	Erçe diyar kir ku Elewî piştgirî didin pêvajoyê û naxwazin ew were xirabkirin an jî were qutkirin. Erçe diyar kir, "Ger em werin gazîkirin komîsyonê, daxuyaniya me zelal e; daxwazên Elewiyan ne nenas in, lê nehatine bicîhanîn. Jidilbûna pêvajoyê nîşan bidin û tevbigerin. Gelo hewcedarî bi guhertinek destûrî heye ku Otêla Madimakê veguherîne Muzexaneya Şermê, gundên Kurd û Elewiyan ên hatine valakirin ji nû ve werin vekirin, biryarên DMME'yê werin bicîhanîn, an jî dersên olî yên mecbûrî werin rakirin? Bi dehan, heta bi sedan made hene ku bi yek îmzeyê dikarin werin bicîhanîn."

	 

	Erçe bal kişand ser girîngiya aştiyê di elewîtiyê de û diyar kir ku rêya aştiyê di Amedê re derbas dibe, lê Amed bi tena serê xwe nikare serkeftinê bi dest bixe. Erçe, got: "Divê ew di Hacî Bektaş, Dêrsim, Sêwaz, Ermenek û Zonguldakê re jî derbas bibe."

	 

	Erçe îşaret bi pêwîstiya hemwelatiya wekhev kir û got: "Mesele guhertina ferasetê ye. Heta ku ev feraset neguhere, ronahî nayê vî welatî. Aştiya rastîn aştiya ku ji binî ve tê avakirin e. Pêvajoyek aştiyê ku hemû beşên civakê mafên xwe diparêzin, pêvajoyeke aştiyê ya mayînde ye. Ev e ya bi rûmet. Girtî di nav mîmarên pêvajoyê de ne. Em pêvajoyek ku kesek ku ji hêla gel û rêxistinekê ve wekî rêber tê hesibandin di girtîgehê de tê girtin, adil nabînin. Ev ne adil e û ne jî dadperwer e. Kesek ku bi salan e di girtîgehê de ye, şansê wî yê domandina vê pêvajoyê tune ye. Ger behsa aştiya rastîn were kirin, divê Abdullah Ocalan û hemû girtiyên siyasî yên ku di girtîgehê de ne werin berdan. Em piştgiriyê didin pêvajoyek ku tu girtiyên siyasî di girtîgehê de nebin."